Policia e Tiranës ka sekuestruar rreth 300 fishekzjarrë në dy subjekte të ndryshme, duke nisur procedim penal në gjendje të lirë për dy pronarët e dyqaneve.

Sipas njoftimit zyrtar, në Astir, shërbimet e Komisariatit të Policisë Nr.6 konstatuan një dyqan ku tregtoheshin lëndë piroteknike në kundërshtim me ligjin. Si rezultat, ndaj pronarit të dyqanit, shtetasit A.Xh., 45 vjeç, u referuan materialet në Prokurori dhe nisi procedimi penal.

Në një tjetër rast, në rrugën “Dervish Hekali”, shërbimet e Komisariatit Nr.4 konstatuan një tjetër subjekt që tregtonte fishekzjarrë. Edhe në këtë rast, ndaj pronarit të dyqanit, shtetasit B.H., 66 vjeç, u nis procedimi penal në gjendje të lirë.

Si provë materiale u sekuestruan rreth 300 fishekzjarrë. Policia ka theksuar se kontrollet do të vijojnë në të gjithë kryeqytetin për të parandaluar tregtimin dhe përdorimin e kundërligjshëm të lëndëve piroteknike.

Policia apelon qytetarët që të denoncojnë çdo rast të paligjshëm të tregtimit apo përdorimit të fishekzjarrëve, duke garantuar reagim të menjëhershëm për ndëshkimin e shkelësve të ligjit.