Grand Theft Auto 6 (GTA 6), një nga lojërat më të pritura në historinë e industrisë së argëtimit, pritet të dalë në treg në vitin 2025, megjithëse raportime të fundit sugjerojnë se publikimi mund të shtyhet deri në 2026.

Rockstar Games, kompania pas suksesit të madh të serisë GTA, njihet për vonesat e projekteve të saj të mëdha, siç ndodhi më parë me Red Dead Redemption 2 dhe Grand Theft Auto 5. Por pritja për GTA 6 duket se do të justifikohet me një produkt që, sipas ekspertëve, pritet të vendosë rekorde të reja në industrinë e lojërave.

Në dhjetor 2023, Rockstar publikoi trailer-in e parë të GTA 6, duke prezantuar një version të modernizuar të qytetit ikonë Vice City, i cili është rikrijuar me detaje mbresëlënëse dhe një stil bashkëkohor.

Një nga risitë më të mëdha të lojës është protagonistja e parë femër në historinë e serisë, Lucia, e cila u mirëprit gjerësisht nga fansat dhe kritikët.

Sipas një raporti nga Financial Times, bazuar në të dhënat nga DFC Intelligence, GTA 6 pritet të gjenerojë mbi 1 miliard dollarë vetëm nga porositë paraprake (pre-orders), duke kaluar rekordin e mëparshëm të vendosur nga GTA 5.

Ekspertët janë të bindur se GTA 6 nuk do të jetë thjesht një lojë, por një fenomen global që do të ndikojë në industrinë e argëtimit për shumë vite. Fansat mbeten me shpresën që Rockstar të përmbushë premtimin për një publikim në 2025.