Një incident i tensionuar ka ndodhur në qytetin e Vlorës, ku qytetarët raportuan për të shtëna me armë zjarri në Bulevardin Ismail Qemali. Sipas burimeve nga policia, ngjarja ka ndodhur pas një debati virtual që ka përshkallëzuar situatën, duke i çuar dy personat në një përplasje fizike. Dyshohet se një prej tyre ka nxjerrë një armë zjarri, duke qëlluar në ajër, dhe më pas është larguar nga vendi i ngjarjes, duke përfituar nga errësira që shkaktoi ndërprerja e energjisë elektrike.

Fatmirësisht, nuk raportohet për persona të lënduar. Policia ka nisur menjëherë hetimet për të identifikuar autorët dhe për të zbardhur ngjarjen. Grupi hetimor ka mbërritur në vendngjarje dhe është duke punuar për të siguruar provat dhe për të kapur personat përgjegjës.

Në një njoftim për shtyp, policia sqaroi se një tjetër raport ka mbërritur në orën 18:36, ku është njoftuar për një konflikt në lagjen “Lef Sallata”, por nuk janë gjetur të përfshirë persona në përleshje. Hetimet vijojnë dhe po kryhen verifikime të hollësishme për të zbardhur të vërtetën e ngjarjes.