Një 37-vjeçar nga Tirana, i identifikuar si A.M., ka rënë në prangat e policisë, nën akuzën e vjedhjes. Autoritetet bëjnë me dije se 37-vjeçari është dyshuar për disa vjedhje të ndodhura në muajin dhjetor 2024, në disa qytete të ndryshme.

Në hetimet e kryera, ka rezultuar se më 4 janar 2025, në lagjen nr. 2 të Ksamilit, në ambientet e një hoteli, A.M. ka vjedhur një çantë me 6000 euro. Po ashtu, ai dyshohet se ka tentuar të vjedhë sende nga një automjet i markës “Audi Q5”, në lagjen nr. 4 të Sarandës, duke thyer xhamin e derës së drejtuesit të automjetit.

Veprimet hetimore kanë zbuluar gjithashtu se ky shtetas ishte shpallur në kërkim për katër vjedhje të tjera:

•Më 13 dhjetor 2024, në Durrës, dyshohet se ka tentuar të vjedhë në një banesë dhe ka vjedhur një celular;

•Më 8 dhjetor 2024, në Tiranë, dyshohet se ka vjedhur në një banesë dhe në një kioskë.

Policia vijon punën për zbardhjen dhe dokumentimin e vjedhjeve të tjera të mundshme që ky shtetas mund të ketë kryer. Materialet procedurale do të kalojnë në Prokurorinë pranë Gjykatës së Shkallës së Parë Sarandë për veprën penale “Vjedhja”.