Durrës – Policia ka finalizuar operacionin e koduar “The Key”, ku ka arrestuar 36-vjeçarin Alfred Hoxha, i cili ishte shpallur në kërkim për një vjedhje të ndodhur në një banesë në Durrës. Hoxha, banues në këtë qytet, akuzohet për vjedhjen e një shume të konsiderueshme parash dhe bizhuterish, duke përdorur një kopje të çelësit të derës së banesës.

Operacioni për kapjen e Hoxhës ka vijuar pas informacionit të siguruar nga inteligjenca informative dhe hetimeve të zhvilluara nga specialistët e Hetimit të Krimeve në Komisariatin e Policisë Durrës. Pas një periudhe ndjekjeje, ai është arrestuar dhe ndaluar për akuzat ndaj tij. Policia vijon hetimet për zbardhjen e plotë të ngjarjes.