Tiranë — Një stuhi e fuqishme dyshimesh, pyetjesh të pashpjeguara dhe heshtjeje zyrtare ka mbuluar godinën e Shërbimit Informativ Kombëtar (SHIK), pas shpalljes në kërkim nga SPAK-u të Ergys Agasit — personazhit të përshkruar si “sekseri i besuar” i pushtetit dhe fijezuesi i lidhjeve me prapaskenat politike.
Prapaskenat e lëvizjeve të tij gjatë arratisjes po kthehen në një skandal shtetëror me përmasa të paprecedenta, ku zërat nga korridoret e inteligjencës ngrenë dyshime mbi përdorimin e logjistikës shtetërore dhe imunitetit zyrtar.
Pikëpyetjet e nxehta që kërkojnë përgjigje nga organet e akuzës:
Lëvizjet me logjistikë sekret: A u ndihmua Ergys Agasi të lëvizte i patrazuar gjatë periudhës që kërkohej nga drejtësia përmes automjeteve speciale të SHIK-ut dhe kush e dha këtë urdhër operativ?
Takimet në zyrën private: A janë të vërteta raportimet se drejtoresha e SHIK-ut, Vlora Hyseni, hynte e dilte rregullisht në zyrën private të Agasit — një person pa asnjë funksion zyrtar shtetëror?
Përgjimet e mundshme të SPAK: A është kapur shefja e inteligjencës në përgjimet e SPAK-ut apo të shërbimeve partnerë gjatë komunikimeve me Agasin për dekonspirim aksionesh apo koordinim interesash?
Roli i Kryeministrisë: A shkonte Hyseni në zyrën e Agasit me porosi direkte të kryeministrit Edi Rama apo për të mbrojtur “sekretet e përbashkëta”?
Eksponentë të ndryshëm dhe opinioni publik po presin të shohin nëse Struktura e Posaçme (SPAK) do të guxojë të thellojë hetimet dhe të lëshojë fletë-arresti për drejtuesit e shërbimit sekret për shpërdorim detyre dhe përkrahje të autorit të krimit, nëse këto prapaskena provohen në dosjet hetimore.