Padova (Itali) — Detaje të reja e tronditëse kanë dalë në dritë nga hetimet e ethshme që po kryejnë Karabinierët e Padovës mbi vrasjen makabre të 35-vjeçarit shqiptar Ferdinant Hoti, trupi i të cilit u gjet brenda një automjeti tip “Fiat Bravo” të fundosur në lumin Tergola.
Sipas të dhënave të fundit nga mediat italiane, ekzekutimi i 35-vjeçarit që jetonte pa një adresë zyrtare në Mirano dyshohet të ketë ndodhur në zonën e Venecias. Hoti është qëlluar me një plumb të vetëm në kokë dhe më pas trupi i tij u transportua me makinë drejt lumit për t’u mbytur bashkë me të gjitha provat.
Pistat e hetimit: Shpërndarja e drogës dhe hakmarrja
Hetuesit italianë po konsiderojnë mundësinë e pjesëmarrjes së disa personave në këtë krim të mirëmenduar, duke u përqendruar në disa pista kryesore:
Rrjeti i drogës: Verifikimi i kontakteve të viktimës me rrethin e shpërndarjes së lëndëve narkotike në zonën e Miranos.
Ngjarja e qershorit: Shqyrtimi i një atentati të ndodhur më 30 qershor – 1 korrik po në Mirano, ku një tjetër shqiptar u plagos me armë zjarri nga dy bashkëatdhetarë. Hetuesit po verifikojnë nëse kjo ngjarje ka lidhje me ekzekutimin e Hotit.
200 kamera dhe qelizat telefonike nën skaner
Për të rindërtuar itinerarin e autorëve, policia po analizon pamjet e rreth 200 kamerave të sigurisë dhe 50 sistemeve për leximin e targave në zonën e Camposampierese-s, përfshirë edhe kamerat e një mobilierie pranë vendit ku makina ra në lumë.
Dyshimet janë se autorët e kishin studiuar më parë terrenin për fundosjen e mjetit. Paralelisht, po analizohen të gjitha të dhënat e tabulateve dhe antenave telefonike të kapura gjatë natës mes së hënës dhe së martës.