Tiranë — Kryeministri Edi Rama ka lëshuar një tjetër replikë të fortë ndaj Partisë Demokratike Europiane (PDE), duke i akuzuar përfaqësuesit e saj për minimizim të dhunës gjatë protestave, pas incidentit të ndodhur me deputeten Irisi Luarasi dhe rasteve të tjera të dhunës ndaj qytetarëve.
Në reagimin e tij publik, Rama shprehet se PDE ka zgjedhur t’i quajë “akte të izoluara” ngjarjet e dhunshme, ndërsa theksoi se për 101 ditë me radhë protesta është zhvilluar në bulevard pa asnjë pengesë për të drejtën e tubimit. Megjithatë, kreu i qeverisë nëllimoi se bllokimi i hyrjes së deputetëve në Parlament dhe goditja e makinave të qytetarëve nuk është protestë, por dhunë e pastër.
Reagimi i plotë i Kryeministrit Edi Rama:
> “Gjyshja ime e mrekullueshme më mësoi urtësinë e vjetër latine: errare humanum est, perseverare diabolicum. Të gabosh është njerëzore, por të këmbëngulësh në të njëjtin gabim është djallëzore.
> Përgjigjja juaj, @democrats_eu, më bën të pyes veten nëse pikërisht politikanë si ju kanë frymëzuar pjesën e dytë të kësaj shprehjeje.
> Ju e dënuat dhunën ndaj përfaqësuesve të zgjedhur vetëm pasi unë jua vura pamjet përpara syve. Dhe më pas, menjëherë, e minimizuat atë duke e quajtur ‘akte të izoluara’.
> Prej 101 ditësh, protesta është zhvilluar në bulevard pa asnjë problem sa i përket të drejtës për t’u tubuar, për të folur dhe për të kritikuar.
> Por të pengosh fizikisht deputetët e zgjedhur që të hyjnë në Parlament dhe të abuzosh me një deputete të respektuar, e cila thjesht po përpiqet të shkojë në vendin e saj të punës, nuk është kundërshtim. Është dhunë.
> Dhe e dini çfarë? Ja ku vjen tani një tjetër shembull i freskët i ‘akteve tuaja të izoluara’. Protestuesit bllokojnë një kryqëzim të qytetit, rrethojnë makinën e një qytetari të zakonshëm, i cili thjesht kërkon të kalojë, dhe fillojnë ta godasin atë. Për çfarë është fajtor ai, saktësisht? Sepse po përpiqet të vazhdojë rrugën e tij?
> A do të kishit mirësinë ta dënonit qartë edhe këtë, pa asnjë justifikim?
> Unë nuk po e përdor dhunën e disave për të diskredituar çdo protestues. Jeni ju që po përdorni sjelljen paqësore të shumëkujt për të minimizuar dhunën e të tjerëve.
Hajde, tregohuni të guximshëm dhe thuajeni: Ky nuk është kundërshtim. Është dhunë.”