Shkodër – Policia e Shkodrës ka zbardhur atentatin e ndodhur mbrëmjen e 5 janarit në zonën e Dragoçit, ku 33-vjeçari Ramazan Mataj u ekzekutua me breshëri kallashnikovi brenda automjetit të tij, një “Mercedes Benz”. Dy autorët e dyshuar, babë e bir, janë arrestuar në kuadër të hetimeve për vrasjen e tij.

Burime të besueshme bëjnë me dije se janë arrestuar Rrustem Hasaj, 60 vjeç, dhe djali i tij, Arjon Hasaj, 29 vjeç, nga fshati Dragoç i Postribës, i njëjti fshat me viktimën. Po ashtu, janë shoqëruar disa persona të tjerë, të cilët mund të kenë dijeni për ngjarjen. Hetimet e para sugjerojnë se vrasja mund të ketë lidhje me konflikte personale, përfshirë mundësinë e ngacmimeve ndaj vajzave në rrjetet sociale.

Ngjarja ndodhi rreth 1.2 km larg banesës së viktimës, ku Ramazan Mataj u qëllua me 29 plumba nga dy anët e automjetit, duke siguruar eliminimin e tij nga atentatori. Hetimet janë në vazhdim për të zbardhur plotësisht rrethanat e ngjarjes dhe për të siguruar prova të mjaftueshme për ndjekjen penale të autorëve.

Mataj, i cili kishte jetuar për një vit në Belgjikë dhe kishte punuar në ndërtim në Ulqin, nuk kishte precedentë penalë. Pas ngjarjes, një banor i zonës ka konstatuar viktimën dhe ka lajmëruar Policinë.