Në gjyqin për grupin kriminal të hetuar në dosjen “Plumbi i Artë”, i penduari i drejtësisë, Nuredin Dumani, ka vazhduar të rrëfejë detaje të reja për veprimtarinë e tij dhe mënyrën se si arriti të lirohej nga qelia pas arrestimeve të mëparshme për vepra të tjera penale.

Dumani, gjatë dëshmisë së tij, ka zbuluar se kishte paguar një shumë parash për të arritur të dilte nga burgu. Ai ka theksuar se avokati Alban Bengasi ka luajtur një rol të rëndësishëm si ndërmjetës për lirimin e tij. Sipas Dumanit, ai ka marrë ndihmë edhe nga vëllai i ish-ministrit të Drejtësisë së kohës, i cili, bashkë me një mjek-ligjor, ka ndihmuar në krijimin e një dokumentacioni që sugjeronte se ai kishte probleme shëndetësore, përfshirë çështje të zemrës, duke mundësuar kështu lirimin e tij nga qelia.

Këto rrëfime janë pjesë e hetimeve që po zhvillohen për grupin kriminal dhe mund të kontribuojnë në qartësimin e veprimtarive të paligjshme që janë hetuar në kuadër të dosjes “Plumbi i Artë”.