Eksperti i kriminalistikës, Ervin Karamuço, ka deklaruar se në masakrën e Dobraçit mund të ketë pasur viktima edhe nga ana e atentatorëve. Karamuço tha se një informacion që ende nuk është konfirmuar nga policia sugjeron se një ose dy nga atentatorët mund të jenë plagosur gjatë ngjarjes tragjike të 30 tetorit.
“Në atë ka edhe një informacion i cili është ende i pakonfirmuar nga ana e policisë sepse nuk janë gjetur prova, që edhe nga ana e atentatorëve ka pasur plagosje. Personi i tretë në vendngjarje në makinën e viktimave ka qëlluar mbi 16 herë me pistoletë. Medohet se mund të jenë plagosur një apo dy atentator. Për njërin prej tyre thuhet se mund të ketë humbur jetën. Megjithatë këto janë të dhëna operative dhe ende nuk janë konfirmuar nga ana e organeve tona”,– tha Karamuço.
Atentati tragjik ndodhi në zonën e Dobracit, në rrugën Shkodër-Koplik, më 30 tetor. Gjatë këtij sulmi, Hamza Lici, vëllai i Ibrahim Licit, u ekzekutua në vend, ndërsa Arlind Bushati, djali i ish-kandidatit të PD për kryebashkiak, Xhemal Bushatit, ndërroi jetë disa orë pas ngjarjes në spitalin e Shkodrës. Kalimtarja Flutura Basha, e cila po lëvizte me motor bashkë me bashkëshortin e saj, Bashkim Basha, gjithashtu u vra në sulm. Bashkëshorti ndërroi jetë 3 ditë më pas në spital.
Deri më tani janë vetëdorëzuar në polici dy nga të dyshuarit për këtë ngjarje, Izmir Sakica dhe Samuel Troshani, në Policinë e Shkodrës.
