Një ditë pasi policia shpalli në kërkim edukatoren e kopshtit “Gledis”, Rudina Gërdani, e cila dyshohet se ka dhunuar një fëmijë 3-vjeçar, ka nisur edhe procedimi për bashkëshortin e saj, 63-vjeçarin me inicialet I.G. Sipas policisë, ai ka kërcënuar babain e fëmijës, Lorenc Rrapa, përmes telefonit, duke i kërkuar që të mbyllë çështjen.

“Specialistët për Hetimin e Krimit në Komisariatin e Policisë Nr.6 proceduan në gjendje të lirë shtetasin I.G., 63 vjeç, bashkëshortin e shtetases R. G., e shpallur në kërkim pasi dyshohet se ka keqtrajtuar një të mitur në kopshtin ku punonte si edukatore”, njoftoi policia.

Procedimi ndaj tij nisi pasi dyshohet se ky shtetas ka kanosur babain e të miturit, shtetasin L. Rrapa, duke e kërcënuar përmes telefonit.

Një ditë më parë, babai i të miturit, Lorenc Rrapa, reagoi ndaj kërcënimeve dhe tha se nuk frikësohet. Ai u shpreh se nuk do të falë asnjë veprim të dhunës ndaj fëmijës së tij.

“Nuk e fal gjakun e fëmijës tim, nuk e fal atë shpullë”, deklaroi ai, duke shtuar: “Nuk trembem nga njerëzit e Rudinës. Unë jam gjithë ditën nga ora 6 e mëngjesit në 6 pasdite në Tiranë. Mua më gjeni ku të doni. Unë nuk trembem. Më kanë bërë presion duke më marrë edhe nga shtete europiane. Më marrin edhe miq të mi. U kam thënë të mos më marrin më për këtë.”

Ai theksoi se nuk do të ndalojë dhe do të vazhdojë kërkesën për drejtësi: “Ata duan të mos e vazhdoj më historinë e Priamit, por unë gjakun e fëmijës tim nuk e shes.”