Zjarrfikësit kanë vënë nën kontroll zjarrin që ra në garazhin e një pallati 8-katësh në zonën e Komunës së Parisit, Tiranë. Sipas raportimeve nga Mbrojtja Civile e Bashkisë Tiranë, flakët kanë djegur tre automjete të parkuara, ndërsa banorët janë evakuuar dhe situata nuk paraqet rrezik për jetën e njerëzve.

Në vendngjarje kanë ndërhyrë dy mjete zjarrfikëse dhe 10 efektivë, të cilët kanë bërë të mundur neutralizimin e flakëve. Aktualisht ka ende prezencë tymi dhe paraprakisht dyshohet se shkaku i zjarrit mund të ketë qenë një shkëndijë elektrike.

Ndërkohë, strukturat e MZSH dhe Policia e Shtetit po vijojnë hetimet për të përcaktuar rrethanat e plota të ngjarjes dhe për të garantuar sigurinë në zonë.