Një shtetas gjerman është qëlluar për vdekje pas një shkëmbimi zjarri në afërsi të kufirit me Kanadanë. Sipas FBI-së, Felix B. po udhëtonte me një vizë turistike të vlefshme në SHBA dhe ishte nën vëzhgim së bashku me shoqëruesen e tij, Teresa Youngblut, një shtetase amerikane, që nga 14 janari. Pas ngjarjes, Youngblut, e cila mbeti e plagosur nga të shtënat, do të paraqitet para një gjykatësi federal të hënën.

Akuzat kundër Youngblut përfshijnë përdorimin e një arme vdekjeprurëse gjatë sulmit ndaj një agjenti të Patrullës Kufitare të SHBA-së dhe përdorimin e një arme gjatë dhe në lidhje me këtë sulm. Megjithatë, ende nuk janë ngritur akuza për vrasjen e agjentit të kufirit.

FBI dhe autoritetet federale kanë hetuar çiftin pas një alarmi të ngritur nga një punonjës hoteli, i cili e kishte vënë re se Youngblut ishte e armatosur. Gjatë kontrollit të automjetit të çifit, autoritetet zbuluan pajisje të ndryshme, përfshirë telefona të mbështjellë me fletë metalike, helmetë balistike, syze për natën, respiratorë dhe municione. Ata gjithashtu gjetën objekte që sugjeronin përgatitje për veprime të tjera, duke përfshirë informacione udhëtimi dhe një ditar të mundshëm.

Hetimet vazhdojnë ndërsa autoritetet përpiqen të zbardhin rrethanat e ngjarjes dhe lidhjet e mundshme të çiftit me aktivitete të tjera.