Policia Rrugore e Tiranës ka arrestuar një shtetas 40-vjeçar, i shpallur në kërkim ndërkombëtar nga autoritetet italiane për trafikim të lëndëve narkotike dhe pjesëmarrje në organizatë kriminale. Arrestimi i tij u realizua pas një monitorimi të kujdesshëm dhe inteligjencës policore, gjatë një kontrolli rutinë në rrugën “Dritan Hoxha” në Tiranë.

Shtetasi, identifikuar si E. P., ishte duke udhëtuar me automjetin tip “Nissan” kur autoritetet e ndaluan dhe, gjatë kontrollit të automjetit, iu gjet dhe iu sekuestrua një shkop metalik. Pas verifikimeve të mëtejshme, ka rezultuar se ai ishte i kërkuar nga autoritetet italiane, pasi Gjykata e Torinos kishte lëshuar një urdhër arresti ndaj tij për akuzat e trafikimit të lëndëve narkotike dhe pjesëmarrje në një organizatë kriminale.

Pas arrestimit, specialistët e Hetimit të Krimeve në Komisariatin e Policisë nr. 2 kanë proceduar me arrestimin provizor të shtetasit E. P., me qëllim ekstradimin e tij në Itali. Interpol Tirana ka nisur procedurat për ekstradimin e këtij shtetasi në Itali për të përballuar akuzat e ngritura ndaj tij.