Një ngjarje e rëndë ka tronditur komunitetin shqiptar në Itali. Ariana Herri, 23 vjeç, ka ndërruar jetë në spitalin e Padovës pas një përkeqësimi të papritur të gjendjes së saj shëndetësore.

Fillimisht, e reja kishte shfaqur simptoma të lehta të një ftohjeje të zakonshme, pas pjesëmarrjes në mbrëmjen tradicionale të Panevin në Maserada. Megjithëse dukej se gjendja e saj po përmirësohej me përdorimin e ilaçeve, më 17-18 janar ajo pësoi një përkeqësim të rëndë dhe u dërgua me urgjencë në spitalin Ca’ Foncello. Atje, mjekët zbuluan se ajo vuante nga një inflamacion i zemrës.

Pavarësisht përpjekjeve të mjekëve dhe transferimit të saj në spitalin e Padovës, Ariana nuk arriti të mbijetojë. Mjekët konfirmuan se shkaku i vdekjes ishte miokarditi fulminant, një gjendje e rrallë dhe e rrezikshme që prek zemrën.

Mediat italiane raportojnë se muajt e fundit, 23-vjeçarja kishte përjetuar episode të panikut dhe takikardi, të cilat dyshohet se lidhen me një periudhë të vështirë emocionale pas përfundimit të një lidhjeje. Ariana kishte ëndërr të bëhej estetiste dhe punonte si banakiere në Maserada.

Varrimi i saj do të mbahet më 27 janar, ora 15:00, në varrezat komunale të Maserada-s. Familjarët, miqtë dhe komuniteti janë të tronditur nga kjo humbje e parakohshme.