Një ngjarje e rëndë ka ndodhur mbrëmjen e kaluar në spitalin e Lushnjës, ku një 6-vjeçar ka humbur jetën pas komplikimeve shëndetësore. Fëmija ishte paraqitur në spital rreth orës 14:00, ndërsa kishte qenë duke u mjekuar në kushte shtëpie nën kujdesin e gjyshërve për gjashtë ditë.

Sipas mjekëve, i mituri vuante nga bronkopneumonia bilaterale. Pas analizave të kryera dhe vlerësimit të gjendjes së rënduar shëndetësore, mjekët vendosën ta dërgojnë fëmijën për trajtim më të specializuar në Tiranë. Megjithatë, i mituri ka ndërruar jetë sapo ka mbërritur në ambulancë nga arresti kardiak, pasojat e sëmundjes së mëparshme.

Në momentet e fundit, kanë qenë të pranishëm mamaja dhe gjyshi i fëmijës, të cilët kanë refuzuar autopsinë dhe kanë marrë trupin e tij për t’i bërë nderimet e fundit. Drejtoria e Spitalit të Lushnjës ka deklaruar se Ministria e Shëndetësisë do të japë më shumë sqarime për rastin, ndërsa Policia e Lushnjës ka nisur procedurat dhe ka dërguar çështjen në prokurori për vlerësimin e rastit tragjik.