Reperi i njohur italian, Fedez, ka reaguar për herë të parë pas akuzave të ish-bashkëshortes së tij, Chiara Ferragni, dhe zbulimeve të fundit nga Fabrizio Corona. Përmes një postimi në Instagram, ai ka mohuar spekulimet dhe ka sqaruar situatën e marrëdhënies së tij me Ferragnin dhe të dashurën e tij të supozuar, Angelica Montini.

“Ideja që kam menduar të braktis gruan time ditën e dasmës për të ikur në anën tjetër të Italisë është thjesht qesharake,” ka shkruar ai. “Zgjodha Chiarën me bindje, e doja dhe ndërtuam një familje së bashku. Ajo do të mbetet gjithmonë e rëndësishme për mua, sepse është nëna e fëmijëve të mi.”

Duke folur për Angelica Montinin, Fedez ka pranuar se e kishte njohur disa muaj para dasmës, por lidhja mes tyre ishte ndërprerë për t’u fokusuar në jetën personale. Ai pranoi se ishte rilidhur me të në një moment të vështirë, kur martesa e tij me Chiarën tashmë po përjetonte kriza të thella.

“Unë nuk kam qenë kurrë shenjtor, por jeta jonë private nuk mund të bëhet pretekst për të ndërtuar rrëfime të pavërteta,” tha reperi, duke mohuar çdo teori konspirative apo manipulim të situatës nga ana e tij.

Në fund të reagimit të tij, Fedez pranoi gabimet dhe theksoi se tani dëshiron të fokusohet tek vetja dhe fëmijët e tij. “Kam bërë një gabim, kam paguar dhe do të vazhdoj të paguaj. Por tani zgjedh realitetin dhe lë pas këtë shfaqje mediatike.”

Deklarata e tij vjen mes një stuhie akuzash dhe spekulimesh që kanë tronditur rrjetet sociale dhe mediat italiane.