Policia e Shtetit ka konfirmuar arrestimin e 30-vjeçarit Edison Pula, një nga personat më të kërkuar nga drejtësia shqiptare, në kuadër të operacionit të koduar “Together”. Ai u kap në Luksemburg pas një bashkëpunimi mes autoriteteve shqiptare dhe homologëve të tyre europianë.

Edison Pula është dënuar me 14 vite burg nga drejtësia shqiptare për një sërë veprash penale, përfshirë “Vrasje me paramendim”, “Shkatërrim i pronës me eksploziv”, “Vjedhje me dhunë” dhe “Mbajtje pa leje e armëve”. Ai ka qenë pjesë e bandës së Niklës dhe është i njohur për arratisjet spektakolare nga burgjet në Shqipëri dhe Itali.

Në qershor të vitit 2022, Pula u arratis nga burgu i Trevisos në Itali, ku po pritej të gjykohej për rreth 50 vjedhje. Më herët, ai u kishte shpëtuar edhe policëve shqiptarë në Krujë, vetëm pak çaste para se të futej në komisariat.

Ndër episodet më të rënda ku ai rezulton i përfshirë është atentati me eksploziv ndaj Gentjan Bejtjes më 19 shtator 2016, ngjarje e lidhur me vrasjen e kryekomisarit Dritan Lamaj. Pikërisht numri i telefonit që aktivizoi bombën tradhtoi Pulën dhe çoi në hetimin e tij së bashku me Oltion Cacën.

Ndërkohë, autoritetet shqiptare dhe Interpoli po vijojnë procedurat për ekstradimin e tij në Shqipëri, ku pritet të përballet me drejtësinë për krimet e rënda që ka kryer.