Kryeministri i Kosovës, Albin Kurti, ka komentuar për herë të parë deklaratat e ish-emisarit amerikan për dialogun, Richard Grenell, i cili e kritikoi për mënyrën e udhëheqjes së politikës së jashtme të Kosovës. Kurti e ka mbrojtur qeverinë e tij duke theksuar se bashkëpunimi me Shtetet e Bashkuara është në nivelin më të lartë, duke përmendur përfitimet për Forcën e Sigurisë së Kosovës (FSK), siç janë helikopterët “Black Hawk” dhe sistemet anti-tank “Javelin”.

Përmes një deklarate në televizionin lokal “Istogu Channel”, Kurti theksoi se Kosova ka marrë ndihmën më të madhe nga Amerika në mandatin e tij, përfshirë një grant të madh për bateritë, dhe se bashkëpunimi mes dy shteteve është i fortë, jo vetëm në aspektin politik, por edhe në zhvillimin e kapaciteteve ushtarake. Kurti shtoi se, megjithë disa kritika, qeveria e tij do të vazhdojë të ecë përpara në marrëdhëniet me SHBA-në.

Nga ana tjetër, Richard Grenell në një postim në platformën ‘X’ e kritikoi ashpër Kurtin, duke e quajtur atë një partner të pa-besueshëm. Ai theksoi se si administrata Trump, ashtu edhe ajo Biden, kanë kritikuar veprimet e njëanshme të Kurtit, të cilat po destabilizojnë rajonin. Grenell u shpreh se komuniteti ndërkombëtar është i bashkuar kundër Kurtit për shkak të veprimeve të tij të njëanshme që, sipas tij, po minojnë stabilitetin në Ballkan.