Këngëtarja e njohur Parashqevi Simaku ka dalë nga spitali në New York pas një periudhe 4-javore rikuperimi. Ajo ka dhënë një mesazh për të gjithë fansat dhe miqtë që e kanë mbështetur gjatë kësaj kohe.

Përmes videove të postuara nga biznesmeni Elton Ilirjani në Instagram, Simaku ndau emocionet e saj duke theksuar se ka qenë në një pushim absolut, ka bërë ushtrime fizike dhe ka konsumuar shumë ujë.

“Të falenderoj nga zemra për këtë dhuratë shpirtërore, njerëzore edhe engjëllore, Elton Ilirjani. Unë bëra një pushim absolut për katër javë. Përditë bëja fiskulturë edhe pija ujë e jo raki,” u shpreh ajo me humor.

Ajo shprehu gjithashtu dëshirën për të ardhur në Tiranë dhe për të organizuar një mbrëmje muzikore për fansat shqiptarë.

“Shpresoj që Zoti na e bën kismet të vijmë në Tiranë dhe të bëjmë një mbrëmje ashtu alla shqiptarçe. Ju falenderoj nga zemra për të gjitha dhuratat dhe lutjet,” shtoi artistja.

Lidhur me gjendjen e saj shëndetësore, Simaku konfirmoi se analizat i kanë dalë me sukses dhe se ndodhet në një gjendje shpirtërore shumë të mirë.

Kujtojmë se gjatë muajit janar, Simaku u shtrua në një spital në New York, një lajm që u bë publik nga Elton Ilirjani. Në atë kohë, ai deklaroi se këngëtarja ishte e shtruar në një spital psikiatrik, ndërsa e përshkroi situatën si një nga momentet më të vështira.

Tani që Simaku është rikuperuar, fansat presin me padurim nëse ajo do të rikthehet në skenë për një koncert të veçantë në Shqipëri.