Kampionët në fuqi të Shqipërisë, Egnatia, vijnë në supersfidën ndaj Partizanit me moral të lartë, duke kryesuar renditjen dhe me 8 fitore radhazi në kampionat. Megjithatë, trajneri Edlir Tetova e di që kjo nuk garanton sukses të sigurt nesër në “Arena Egnatia”, ku do të zhvillohet përballja e javës së 25-të të Superiores.

Në konferencën për shtyp, Tetova vlerësoi formën e skuadrës, por pranoi se ka disa mungesa të rëndësishme:

“Gjendja e skuadrës është e mirë përgjithësisht, por kemi disa mungesa. Xhemajli mungon për shkak të kartonëve, Guindo ka një gjendje gripale, ndërsa Fernando është rikthyer dhe mund të ketë minutazh. Pjesa tjetër e grupit është gati.

Lojtarët kryesorë kanë përballuar shumë ndeshje pa mundësi rotacionesh, por do të japin maksimumin edhe në këtë sfidë. Nuk mendojmë për hakmarrje, duam të ruajmë ritmin dhe vazhdimësinë.”

Trajneri e cilësoi këtë fazë të kampionatit si një mini “Final Four”, pasi Egnatia do të përballet me tre rivalë të drejtpërdrejtë për titullin: Partizanin, Dinamon dhe Vllazninë.

“Duhet të jemi të kujdesshëm për të mos pësuar gola. Janë edhe 12 javë deri në fund, dhe çdo pikë është vendimtare. Vetëm me vazhdimësi do ta kemi më të lehtë në fazën përfundimtare të kampionatit.”

Egnatia synon të mbrojë titullin kampion, ndërsa sfida ndaj Partizanit shihet si një test i madh për formën dhe ambiciet e tyre në këtë sezon të Abissnet Superiore.