Presidenti i Turqisë, Recep Tayyip Erdoğan, i ka bërë thirrje Presidentit të sapozgjedhur të SHBA-së, Donald Trump, që të përmbushë angazhimet e tij dhe të ndërmarrë hapa për ndërtimin e paqes.

“Presim që zoti Trump të përmbushë angazhimet e dhëna para zgjedhjeve. Duhet të ndërmarrë hapa për ndërtimin e paqes, jo për nisjen e një lufte të re,” theksoi Erdogan.

Kriza në Gaza dhe qëndrimi i vendeve islame

Duke folur për krizën në Gaza, Erdogan e cilësoi situatën si një “plagë të hapur për botën islame”, duke theksuar se është e domosdoshme të punohet për t’i dhënë fund vuajtjeve atje.

“Gaza është një dhimbje në zemrat tona. Jemi të detyruar të punojmë pa pushim për të ndalur këtë vuajtje,” tha ai.

Megjithatë, Erdogan pranoi se vendet islame ende nuk kanë arritur të marrin një qëndrim të bashkuar për këtë çështje.

“Fatkeqësisht, nuk kemi mundur të ndërmarrim një hap të përbashkët,” deklaroi ai, duke përmendur se disa vende, si Katari, po ndihmojnë me furnizime dhe pajisje për rindërtimin e Gazës.

Ai kritikoi gjithashtu mungesën e një armëpushimi të qartë, pavarësisht deklaratave për një marrëveshje.

“Nuk po shohim shenja të një armëpushimi të vërtetë,” tha Erdogan.

Ndihma për Sirinë dhe pritshmëritë nga takimi Trump-Putin

Në lidhje me situatën në Siri, Erdogan tha se atje nevojiten mjete ndërtimi për të rikuperuar dëmet e shkaktuara nga lufta dhe shtoi se Turqia është e gatshme të ndihmojë në këtë drejtim.

Ai gjithashtu u shpreh se po ndjek me interes takimin e pritshëm midis Trump dhe Presidentit rus, Vladimir Putin, duke shpresuar që ky dialog të sjellë një zgjidhje pozitive për paqen globale.