Gjergj Nika ka shpallur kandidaturën e tij për deputet në qarkun e Vlorës në zgjedhjet e 11 majit, duke u përfaqësuar nga Demokratët Euroatlantikë.

Në një deklaratë publike, ai shpreh vendosmërinë për të kontribuar për qytetin e tij dhe për të sjellë një ndryshim në politikën shqiptare.

“Si shumë prej jush, kam zgjedhur të jetoj, punoj dhe ndërtoj të ardhmen time në Vlorë. Fatkeqësisht, Shqipëria ndodhet në një situatë të vështirë për shkak të keqqeverisjes, korrupsionit dhe mungesës së transparencës. Jemi përpara një zgjedhjeje historike: do të vazhdojmë të tolerojmë këtë realitet apo do të marrim fatin tonë në dorë?” – shprehet Nika.

Ai thekson se ka 25 vite angazhim në politikë, duke u udhëhequr nga vlerat, parimet dhe morali dhe se si anëtar i Këshillit Bashkiak të Vlorës, ka ngritur zërin për problemet e qytetit dhe ka propozuar zgjidhje që sipas tij janë refuzuar nga mazhoranca socialiste.

Gjergj Nika deklaron se Demokratët Euroatlantikë janë forca e vetme me një program të qartë për liri, siguri, arsim, shëndetësi dhe drejtësi, duke ofruar një kulturë të re politike, më të ndershme dhe më dinjitoze.

Dhe, ju garantoj, nuk është kërkesë karrieriste, as ambicie e akumuluar, por premtim se do të jem zëri juaj.
Demokratët Euroatlantikë përfaqësojnë vizionin, tek i cili unë besoj pa asnjë mëdyshje.
Demokratët Euroatlantikë janë të vetmit që kanë paraqitur një program të detajuar ku liria, siguria, arsimi, shëndetësia e Drejtësia; ku politika u shërben zgjidhjeve reale; ku qytetarët dhe Shqipëria Europiane janë kryefjala!
Gjatë ditëve e javëve në vijim do të kemi mundësi të bashkëbisedojmë; jo vetëm të dëgjoni prej meje vizionin dhe idetë e mia dhe të Demokratëve Euroatlantikë, por edhe të dëgjoj e dëgjojmë prej jush gjithçka që ju e quani të rëndësishme për të ndryshuar e përmirësuar, për të dëgjuar të vërtetat e për të luftuar për to!
E di që nuk është e lehtë, sepse përballë kemi një klasë politike të korruptuar dhe kundër shqiptarëve.
Por unë besoj se ka ende shpresë e forca për të ndryshuar.
Jam i bindur se ne Demokratët Euroatlantikë do të sjellim në Shqipëri një kulturë tjetër politike: me më shumë moral, më njerëzore, më dinjitoze, më të ndershme.
Jam i bindur se ne Demokratët Euroatlantikë kemi sot përpara një përgjegjësi të madhe: Të ndërtojmë të ardhmen tonë europiane, të ardhmen që Shqipëria meriton të ketë.