Në një ceremoni solemne për nder të 17 vjetorit të Pavarësisë së Kosovës, Presidentja Vjosa Osmani ka ndarë Dekorata Presidenciale për personalitete të shquara vendore dhe ndërkombëtare, duke e nderuar më shumë se çdo herë trashëgiminë e sakrificës dhe heroizmit që ka kontribuar në lirinë e Kosovës.

Një nga momentet më të paharrueshme të ceremonisë ishte ndarja e urdhrave post mortem “Hero i Kosovës” për Shaban Jasharin, kryefamiljarin e familjes Jashari, të cilin e mori Bekim Jashari. Presidentja Osmani theksoi se familja Jashari është themeli mbi të cilin u ngrit liria e Kosovës, duke e quajtur atë një moment të gjallë të sakrificës dhe heroizmit të pashoq. Ajo shtoi se “në historinë e njerëzimit rrallë ka ndodhur që një familje e tërë të flijohet për idealin e shenjtë të lirisë.”

Po ashtu, u nda dekorata post mortem “Urdhri i Lirisë” për familjen Jashari, duke e pranuar Besarta Jashari, si dhe urdhri “Hero i Kosovës” për Fehmi Lladrvocin, dhe “Heroina e Kosovës” për Xhevë Lladrovcin për trimërinë dhe sakrificën e tyre për lirinë e vendit. Dekorata të tjera u ndanë gjithashtu për Tahir Sinanin për kontributin e tij në luftën për lirinë e Kosovës.

Ky moment do të mbetet i paharruar, duke përkujtuar sakrificën e jashtëzakonshme të këtyre figurave të shquara që dhanë gjithçka për të siguruar lirinë e Kosovës.