Prokuroria e Gjirokastrës ka vendosur sekuestrimin e pasurive të shtetasit D.A., i dyshuar për pjesëmarrje dhe kryerje të krimeve nga grup kriminal, kryesisht në fushën e prodhimit dhe shitjes së narkotikëve.
Në kuadër të procedimeve pasurore, u identifikuan një sërë pasurish të paluajtshme që dyshohet se janë fituar përmes aktiviteteve kriminale, të cilat nuk justifikohen nga të ardhurat e tij apo të familjarëve.
Pasuritë e sekuestruara përfshijnë tokë, truall, biznese, një kalçeto në Lazarat, dhe një automjet. Lista e pasurive të sekuestruara përfshin:
•Truall 350 m² në qytetin Gjirokastër
•Truall 1500 m² dhe ndërtim 23 m² në Lazarat, Gjirokastër
•Truall 450 m² në Grehot, Gjirokastër
•Truall 1646 m² në Grehot, Gjirokastër
•Arë 7000 m² në fshatin Arshi Lengo, Gjirokastër
•Objekt tregtie 6500 m², ndërtuar në vitin 2005 në fshatin Kordhocë, Lazarat
•Lokal dhe magazinë, ndërtuar në vitin 2013 në fshatin Kordhocë
•Fushë mini futbolli me sipërfaqe 500 m² dhe një ndërtesë një kat me sipërfaqe 37.2 m², ndërtuar në Lazarat
•Automjet “Mercedes Benz”
Ky veprim vjen si rezultat i hetimeve intensive të prokurorisë për të luftuar veprimtaritë kriminale dhe pastrim parash, me fokus të veçantë në veprat që lidhen me narkotikët.
