Deputetja e Partisë Demokratike, Dhurata Çupi, ka reaguar ashpër ndaj tubimit të thirrur nga kryeministri Edi Rama me punonjësit e Bashkisë Tiranë në sheshin “Skënderbej”. Në një postim në rrjetet sociale, ajo e ka cilësuar këtë veprim si shkelje të autonomisë së pushtetit lokal dhe një akt antidemokratik.

“Antikushtetuese, sepse ka shkelur kokë e këmbë autonominë që Kushtetuta dhe ligji i garantojnë pushtetit lokal nga qeveria. Nuk ndodh në një shtet demokratik që kryeministri të thërresë në apel punonjësit e pushtetit lokal, edhe sikur ata të flenë me fotografinë e Edi Ramës nën jastëk,” shkruan Çupi.

Tubimi i organizuar ka ngjallur debate të shumta politike, me opozitën që e konsideron një presion politik mbi administratën lokale. Ndërkohë, nga ana tjetër, mazhoranca ende nuk ka reaguar për këto akuza.

Situata mbetet e tensionuar, ndërsa përplasjet mes mazhorancës dhe opozitës për këtë çështje pritet të vijojnë edhe në ditët në vijim.