Kryeministri Edi Rama ka zhvilluar sot një takim me punonjësit e Bashkisë së Tiranës, ku ka adresuar situatën e krijuar pas arrestimit të kryebashkiakut Erion Veliaj.

Në fjalën e tij, Rama tha se e kërkoi këtë mbledhje për të folur me ata që janë të prekur, të zhgënjyer e të dëshpëruar nga ngjarjet e fundit. Ai theksoi se disa punonjës të bashkisë dolën për të protestuar ditën që Veliaj u arrestua, duke e cilësuar këtë si një veprim të gabuar që nuk duhet të përsëritet.

“Ai ishte një gabim që nuk duhet të ndodhë më. Secili prej jush përfaqëson një skuadër të madhe, një pushtet autonom dhe nuk duhet të shfaqet para një pushteti tjetër. Nuk mendoj shumë ndryshe nga ata që protestuan. Kryetari i Bashkisë së Tiranës mbahet sot në burg me statusin e të dyshuarit dhe ende jo me atë të pandehurit apo të fajtorit,” u shpreh Rama.

Kryeministri vlerësoi punën e bërë për transformimin e Tiranës, duke e krahasuar me procesin e reformës në drejtësi. “E transformuam Tiranën nga një ferr mbi tokë në një qytet evropian me kurajo dhe mundime të mëdha, ashtu kemi vendosur të transformojmë dhe drejtësinë në Shqipëri. Siç shembëm ngrehinat në Tiranë, ashtu kemi shembur arkitekturën e vjetër të drejtësisë,” theksoi ai.

Takimi vjen në një moment tensioni politik, ndërsa pritet të shihet se si do të zhvillohen më tej ngjarjet lidhur me çështjen e kryebashkiakut të Tiranës dhe hetimet ndaj tij.