Kryeministri Edi Rama ka zhvilluar një takim me punonjësit e Bashkisë së Tiranës, ku foli për arrestimin e kryebashkiakut Erion Veliaj. Ai shprehu keqardhjen për situatën dhe u shpreh se mbajtja në burg e Veliajt pa një gjyq të zhvilluar është e pashpjegueshme.
“E kërkova këtë mbledhje sepse gjatë këtyre ditëve kam parë mes jush, por edhe mes shumë të tjerësh, njerëz të prekur e të dëshpëruar. Disa nga ju shkuan edhe tek dera e GJKKO për të protestuar ditën që kryetari i bashkisë u la në burg pa gjyq. Nuk dua t’i gjykoj keq, përkundrazi e mirëkuptoj emocionin e tyre, por ishte një gabim që nuk duhet të përsëritet më,” tha Rama.
Ai theksoi se Veliaj është në burg si i dyshuar dhe jo si i pandehur apo fajtor, duke nënvizuar se ky vendim është i pashpjegueshëm për qytetarët e Tiranës që e kanë votuar për ta drejtuar kryeqytetin nga zyra dhe jo për ta parë pas hekurave.
