Deputeti i Partisë Demokratike, Ferdinand Xhaferri, ka vendosur të heqë dorë nga procesi i primareve të partisë, duke e cilësuar këtë proces si të manipuluar dhe jo të vërtetë. Ai ka theksuar se, megjithëse anëtarësia do të ftohet për të marrë pjesë në primare, fjalën e fundit për zgjedhjen e kandidatëve do ta ketë Sali Berisha.

“Do ftohet anëtarësia e partisë dhe nuk do të zgjedhë, thjesht do bëjë një pakt emrat që do futen te zyra e Berishës dhe në fund do t’i zgjedhë ai emrat. Këto nuk do të ishin primare, por çereknare,” tha Xhaferri.

Ai gjithashtu shtoi se, më parë, Berisha ka shpallur drejtuesit politik pa u konsultuar me asnjë nga anëtarët, duke përdorur vetëm një kriter: besnikërinë ndaj tij. Xhaferri e konsideron këtë një proces të gabuar dhe ka shprehur shqetësim për mënyrën si po zhvillohet.