Koordinatori rajonal i Partisë Demokratike për Tiranën, Klevis Balliu, ka kritikuar ashpër mbledhjen e organizuar nga kryeministri Edi Rama me punonjësit e Bashkisë së Tiranës. Në një intervistë televizive, Balliu e cilësoi këtë mbledhje si të paligjshme dhe një shenjë të qartë të rënies së shtetit.

Sipas tij, fakti që Rama po ndërhyn në punët e Bashkisë së Tiranës, ndërkohë që kryebashkiaku Erion Veliaj ndodhet në burg, tregon se vendi ndodhet në një “narkoshtet”, ku mbledhje të tilla bëhen për të fshehur abuzimet dhe aferat korruptive.

“Pavarësisht tentativave të Ramës për të fshehur të gjitha abuzimet dhe vjedhjet që ka bërë për pothuajse 12 vjet, ai nuk mund ta fshehë më asgjë dhe as të shpëtojë nga drejtësia,” – tha Balliu.

Ai shtoi se aktualisht, Bashkia e Tiranës drejtohet nga burgu, përmes kryebashkiakut Veliaj, ndërsa Rama po përpiqet të shfajësohet para tij duke pretenduar se nuk e ka futur ai në qeli. Balliu gjithashtu theksoi se Veliaj ka refuzuar një takim me Ramën në burg, pavarësisht përpjekjeve të këtij të fundit për ta takuar.