Policia dhe forcat speciale RENEA kanë shoqëruar sot Safet Bajrin, një nga emrat më të përfolur të botës së krimit në Shkodër, i cili dyshohet për përfshirje në një sërë ngjarjesh të rënda kriminale.

Bajri është transportuar drejt Tiranës nën masa të rrepta sigurie, ku pritet të merret në pyetje nga prokurorët. Dy ditë më parë, forcat RENEA zhvilluan kontrolle në banesën e tij në Dobraç të Shkodrës, ndërsa sot ai është shoqëruar me vendim gjykate, për shkak se kishte refuzuar të dorëzonte mostra gjaku dhe pështyme për analizën e ADN-së.

Sipas avokatëve të tij, Safet Bajri ishte thirrur për të dhënë deklarime në orën 11:00, por pas mbërritjes në polici, i është komunikuar se marrja në pyetje do të kryhet në Tiranë. Ata pretendojnë se nuk i është komunikuar asnjë urdhër arresti, por është kërkuar për herë të dytë marrja e ADN-së së tij.

Në këto kushte, SPAK i është drejtuar gjykatës, e cila ka miratuar shoqërimin e detyrueshëm të Bajrit për marrjen e kampionit biologjik. Hetimet vazhdojnë për të zbardhur rolin dhe përfshirjen e tij në aktivitetet kriminale.