Policia e Durrësit ka identifikuar dhe arrestuar shtetasin P. P., 43 vjeç, banues në Durrës, i dyshuar për kryerjen e tre vjedhjeve në qytet gjatë javës së fundit.

Pas kallëzimeve të marra për vjedhje në disa banesa dhe biznese, shërbimet e Komisariatit të Policisë Durrës organizuan një operacion për kapjen e autorit. Nga hetimet rezulton se më 14 shkurt 2025, 43-vjeçari ka vjedhur disa pajisje në një biznes në lagjen nr. 18. Po ashtu, më 19 shkurt ka vjedhur vegla pune nga një automjet, duke thyer xhamin e tij në lagjen nr. 1, si dhe ka kryer një tjetër vjedhje në një banesë në Porto Romano.

Hetimet vijojnë për të zbuluar nëse ai është i përfshirë edhe në raste të tjera vjedhjeje.

Materialet procedurale i janë dorëzuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme ligjore.