Tiranë – Detaje të reja kanë dalë në dritë lidhur me arrestimin e Safet Bajrit, i cili u ndalua sot nga forcat RENEA me urdhër të Prokurorisë së Posaçme (SPAK). Bajri dyshohet për ekzekutimin e Fatbardh Licit në vitin 2018, në bashkëpunim me kushëririn e tij Behar Bajri dhe krahun e tij të djathtë, Asmer Bilali.

Gazetarja Klodiana Lala raportoi se Safet Bajri u arrestua në banesën e tij në Dobraç pa bërë rezistencë dhe më pas u shoqërua në Drejtorinë e Policisë në Tiranë. Përveç tij, SPAK ka lëshuar edhe dy urdhër-arreste të tjera për Behar Bajrin dhe Asmer Bilalin. Të dy ndodhen aktualisht në burg për akuza të tjera dhe pritet t’u komunikohet masa e re e sigurisë.

Sipas burimeve zyrtare, ndaj Safet Bajrit rëndojnë akuzat për vrasje me paramendim dhe përfshirje në një grup të strukturuar kriminal. Behar Bajri, kushëriri i tij, akuzohet gjithashtu për përfshirje në ekzekutimin e Fatbardh Licit dhe është aktualisht në paraburgim, ku po gjykohet nga GJKKO në kuadër të operacionit “Metamorfoza”. Ndërkohë, Asmer Bilali, i konsideruar si krahu i djathtë i grupit Bajri, ndodhet në burgun e Reçit dhe pritet t’i komunikohet akuza për të njëjtën vrasje.

Po ashtu, grupi i Bajrit është nën hetim për masakrën e Dobraçit, ku mbetën të vrarë Hamza Lici dhe Arlind Bushati, si dhe çifti i pafajshëm Flutura dhe Bashkim Basha. Autoritetet vijojnë hetimet për të zbardhur plotësisht të gjitha përfshirjet dhe përgjegjësitë në këto ngjarje të rënda kriminale.