Policia e Tiranës ka arrestuar Elion Vathin (Kaci), një 39-vjeçar të shpallur në kërkim ndërkombëtar nga autoritetet spanjolle për akuzën e vrasjes. Arrestimi i Vathit u realizua nga Forca e Posaçme Operacionale, në bashkëpunim me Sektorin e Krimeve të Rënda, në kuadër të operacionit të koduar “Lacking”.
Vathi ishte shpallur në kërkim ndërkombëtar pasi autoritetet gjyqësore në Spanjë kishin lëshuar një urdhër arresti ndërkombëtar për të, për veprën penale të ‘Vrasjes’, parashikuar nga Kodi Penal i Spanjës.
Interpol Tirana, në bashkëpunim me autoritetet ligjzbatuese spanjolle, ka nisur procedurat për ekstradimin e këtij shtetasi. Operacioni ka qenë rezultat i informacioneve të siguruara në rrugë policore dhe ka përfshirë një bashkëpunim të ngushtë me autoritetet spanjolle për të mundësuar kapjen e Vathit dhe ekstradimin e tij drejt Spanjës.
