Mijëra protestues të partisë ultra-nacionaliste “Ringjallja” në Bullgari shpërthyen në dhunë gjatë një proteste, duke tentuar të hynë në ndërtesat e Komisionit Evropian dhe Parlamentit Evropian. Protestuesit, të cilët mbështesin ideologji radikale, lanë shenja vandalizmi duke lyer me bojë të kuqe fasadat e ndërtesave dhe tentuan të vënë flakën hyrjes. Përveç kësaj, ata hodhën fishekzjarre, vezë dhe balona të mbushura me bojë të kuqe.

Autoritetet dhe policia mbërritën menjëherë në vendngjarje, duke ndërhyrë për të kontrolluar situatën. Raportohet se 10 oficerë policie kanë pësuar lëndime dhe 6 protestues janë arrestuar gjatë përleshjeve.

Stefan Ivanov, zv.shefi i departamentit rajonal të Ministrisë së Brendshme, theksoi në një konferencë për mediat se protesta, e cila ishte zhvilluar përpara ndërtesës së Komisionit Evropian dhe Parlamentit Evropian, nuk ishte autorizuar. Ai shtoi se policia kishte marrë masa për mbrojtjen e institucioneve dhe për t’u siguruar që dhuna të ndalohej. Presidentja e Komisionit Evropian, Ursula von der Leyen, reagoi duke shprehur indinjatën e saj për aktet e dhunshme dhe vandalizmin, duke theksuar se në Evropë, të drejta për të demonstruar duhet të ushtrohen në mënyrë paqësore.