Prishtinë, 22 shkurt 2025 – Ambasada amerikane në Kosovë ka reaguar ndaj mbylljes së papritur dhe të pa-kordinuar të Qendrave për Punë Sociale, të drejtuara nga Serbia, në pjesën veriore të Kosovës. Në një deklaratë të publikuar në X (ish-Twitter), Ambasada e SHBA-ve tha se këto veprime dhe të ngjashmet ndikojnë negativisht në mijëra qytetarë të Kosovës dhe mund të kenë pasoja të dëmshme për të ardhmen e Kosovës në Evropë dhe për marrëdhëniet bilaterale mes dy vendeve.

Qendrat për Punë Sociale të mbyllura, që funksiononin si pjesë e sistemit paralel serb në veri, u mbyllën pas dyshimeve për aktivitete të paligjshme lidhur me procesin zgjedhor. Policia e Kosovës, pas arrestimit të katër punonjësve të një prej Qendrave në Zubin Potok më 8 shkurt, kërkoi leje nga Prokuroria Themelore në Mitrovicë për të kontrolluar objektet dhe verifikuar dyshimet. Disa nga punonjësit e këtyre qendrave janë akuzuar për përdorimin e presionit mbi qytetarët për të ndikuar në votimet zgjedhore.

Edhe Bashkimi Evropian ka kërkuar nga autoritetet e Kosovës që të mos i mbyllë këto struktura dhe t’i trajtojë ato në kuadër të dialogut me Serbinë, duke theksuar rëndësinë e gjetjes së një zgjidhjeje nëpërmjet bisedimeve.

Zgjedhjet parlamentare në Kosovë të mbajtura më 9 shkurt dhanë fitoren për Lëvizjen Vetëvendosje të kryeministrit Albin Kurti, ndërsa Lista Serbe, e mbështetur nga Beogradi, fitoi në mesin e komunitetit serb. Reagimet nga Beogradi kanë pasuar, me autoritetet serbe që kanë shprehur mbështetje për punonjësit e Qendrave të Punës Sociale, duke i siguruar ata se nuk do të mbeten pa paga dhe se ndihmat sociale do të vazhdojnë të paguhen nga shteti serb.

Ky tension ka shkaktuar shqetësime të mëdha lidhur me ndikimin e jashtëm në zgjedhjet dhe proceset e brendshme të Kosovës, duke përfshirë ndërhyrjen e mundshme të Serbisë në to.