Një atentat me armë zjarri ka ndodhur mbrëmjen e së shtunës në Kamëz, ku një automjet është qëlluar nga një makinë tjetër. Policia ka arrestuar një 17-vjeçar, i cili dyshohet se drejtonte automjetin nga ku u krye atentati.

17-vjeçari është arrestuar për veprat penale “Veprime që pengojnë zbulimin e së vërtetës”, “Deklarata e rreme para oficerit të policisë gjyqësore” dhe “Drejtimi i automjetit në mënyrë të parregullt”. Hetimet kanë zbuluar se ai ka dhënë një deklaratë të rreme për të mbuluar autorët e vërtetë të ngjarjes.

Policia ka identifikuar dhe shpallur në kërkim tre shtetas të tjerë, përfshirë dy autorët e dyshuar të atentatit, Fabion Kurti dhe Dejvi Mullai, të cilët dyshohet se kanë qëlluar me armë drejt makinës tjetër. Hetimet kanë nxjerrë në pah se shënjestra e atentatit mund të ketë qenë Enedjon Kaçi, ndërsa për shkakun e ngjarjes dyshohet të ketë qenë një konflikt për lëndë narkotike.

Në vijim të hetimeve, policia po punon për kapjen e tre personave të shpallur në kërkim dhe për dokumentimin e plotë të ngjarjes.