Tiranë – Dhoma Kombëtare e Avokatisë ka vendosur sot të heqë licencën e avokatit ish-kreut të Gjykatës Kushtetuese, Bashkim Dedja, pas dënimit të tij nga Apeli i Posaçëm Antikorrupsion për fshehje pasurie.

Gjykata e Posaçme e Shkallës së Parë e dënoi Dedjen me 6 muaj burg, i cili më pas u konvertua në 1 vit shërbim prove. Ndërkohë, Prokuroria kishte kërkuar një dënim me 1 vit burg, por vendimi i dhënë nga Shkalla e Parë u la në fuqi nga Apeli më 13 shkurt.

Dedja u akuzua nga SPAK për fshehjen e një apartamenti 60 m² në Golem, që ai pretendonte se ishte në pronësi të vëllait të tij. Po ashtu, ai akuzohet për deklarim të rremë në lidhje me një apartament 146 m² në Tiranë dhe një hua prej 10 mijë eurosh, e cila, sipas hetimeve, rezultoi e pajustifikuar nga huadhënësi.

Ish-kryetari i Gjykatës Kushtetuese e kaloi shkallën e parë të Vettingut, por u shkarkua nga Kolegji i Posaçëm i Apelimit. Pas dënimit nga drejtësia, heqja e licencës nga Dhoma e Avokatisë e përjashton atë nga ushtrimi i profesionit të avokatit.