Një studim i ri i botuar në Proceedings of the National Academy of Sciences ka zbuluar prova të forta se Marsi mund të ketë pasur dikur oqeane dhe plazhe të ngjashme me ato të Tokës. Të dhënat nëntokësore, të analizuara nga një ekip ndërkombëtar shkencëtarësh, tregojnë formacione shkëmbore që sugjerojnë praninë e një oqeani të lashtë në hemisferën veriore të planetit të kuq.

Studiuesit nga Universiteti Penn State në SHBA dhe Universiteti Guangzhou në Kinë përdorën të dhëna të mbledhura nga roveri kinez Zhurong, duke zbuluar struktura të shtresuara nën sipërfaqen marsiane, të njohura si “depozita në breg”. Këto formacione krijohen kur valët dhe baticat bartin sedimente në trupa të mëdhenj ujorë.

“Aspektet që kemi gjetur—mungesa e rërës, ndikimi i valëve, dhe erozioni—tregojnë për ekzistencën e plazheve të lashta,” tha Benjamin Cardenas, profesor i gjeologjisë në Penn State dhe një nga autorët e studimit. Ai shtoi se këndet e zhytjes së depozitave marsiane përputhen me ato të gjetura në plazhet e Tokës, duke treguar një ndërveprim të mëparshëm midis ajrit dhe ujit në Mars.

Ky zbulim forcon teorinë se Marsi dikur ka qenë një planet i lagësht, me kushte që mund të kenë mbështetur jetën për miliona vjet. Studimi hedh dritë mbi historinë klimatike të planetit dhe mund të ndihmojë në kërkimet e ardhshme për gjurmët e jetës në Mars.