Në mbledhjen e sotme të Këshillit Bashkiak të Tiranës, shumica socialiste refuzoi kërkesën ligjore për një mocion me debat mbi shkarkimin e kryetarit të arrestuar, duke bllokuar kështu zërin e opozitës.

Anëtarja e Këshillit Bashkiak, Beti Njuma, në një reagim publik, e cilësoi këtë si një shkelje të hapur të ligjit nga socialistët dhe nënkryetari Hodaj, të cilët, sipas saj, mohuan të drejtën e fjalës për opozitën.

Njuma ironizoi situatën duke thënë se, ndërsa debati u pengua, “Erion Veliaj” apo fantazma e tij po ndiqte mbledhjen LIVE, ndoshta duke ëndërruar rikthimin në karrigen e humbur. Sipas saj, reagimet e tij në rrjetet sociale tregojnë një përkeqësim të tij psikik.

Ajo nënvizoi se Këshilli Bashkiak duhet të marrë përgjegjësinë për të formalizuar shkarkimin e Veliajt, i cili, sipas saj, tashmë ka rënë de facto nga posti. Zvarritja e këtij procesi, theksoi ajo, është e pajustifikueshme dhe e paligjshme.

Opozita ka vijuar të akuzojë mazhorancën për kapjen e institucioneve dhe përpjekje për të penguar transparencën dhe proceset ligjore. Ndërkohë, situata mbetet e tensionuar në Këshillin Bashkiak, me përplasjet mes palëve që pritet të vijojnë edhe në ditët në vijim.