NJU JORK – Kryetari i Bashkisë së Nju Jorkut, Eric Adams, i kërkoi një gjykatësi federal të mërkurën që të mbyllë çështjen për korrupsion ndaj tij, duke pretenduar se prokuroria ka shkelur procedurat, ndërsa Departamenti i Drejtësisë kërkon rrëzimin e akuzave kundër tij.

Në dokumentet e depozituara në Gjykatën Federale të Manhatanit, avokatët e Adams argumentojnë se rrjedhja e një letre nga prokurorja e atëhershme, Danielle Sassoon, drejtuar Prokurores së Përgjithshme të SHBA-së, Pam Bondi, tregon ndërhyrje të papranueshme në çështje.

Sipas letrës, Sassoon dha dorëheqjen pasi refuzoi të ndiqte urdhrin e Nënprokurorit të Përgjithshëm në detyrë, Emil Bove, për të rrëzuar akuzat kundër Adams. Në letrën e tij, Bove theksonte rëndësinë e kryebashkiakut në përparësitë e administratës Trump për zbatimin e ligjit, veçanërisht në luftën kundër imigracionit të paligjshëm dhe krimit të dhunshëm.

Avokatët e Adams pretendojnë se publikimi i letrës së dorëheqjes së Sassoon është pjesë e një rrjedhjeje të qëllimshme informacioni brenda Departamentit të Drejtësisë, duke cenuar të drejtat kushtetuese të klientit të tyre dhe duke ndikuar në të drejtën për një gjykim të drejtë.

Çështja kundër Adams lidhet me akuza për pranimin e mbi 100,000 dollarëve në formë kontributesh të paligjshme për fushatën dhe bileta udhëtimi nga një zyrtar turk dhe individë të tjerë që kërkonin të blinin ndikim politik.

Përballë sfidave në zgjedhjet paraprake të qershorit brenda Partisë Demokratike, Adams ka mohuar të gjitha akuzat. Avokatët e tij argumentojnë se përplasjet e brendshme në Departamentin e Drejtësisë dhe rrjedhja e informacionit kanë cenuar procesin gjyqësor.

Departamenti i Drejtësisë nuk ka dhënë ende një koment zyrtar mbi këto pretendime, ndërsa gjykatësi i Manhatanit ka anuluar një seancë të planifikuar në prill dhe ka emëruar një këshilltar të jashtëm për të ndihmuar në shqyrtimin e çështjes në javët e ardhshme.