DURRËS – Një aksident i rëndë ka ndodhur sot në lagjen nr. 13 të Durrësit, në rrugën “Martin Camaj”, ku si pasojë ka humbur jetën një 37-vjeçar, ndërsa dy gra kanë mbetur të plagosura.

Sipas informacioneve paraprake, automjeti i drejtuar nga shtetasi R. L., 37 vjeç, është përplasur me automjetin që drejtohej nga shtetasja T. Ç., 49 vjeçe. Përplasja ka rezultuar fatale për drejtuesin e mjetit, R. L., i cili ka ndërruar jetë në vendngjarje.

Ndërkohë, drejtuesja e makinës tjetër, T. Ç., dhe pasagjerja e saj, K. D., kanë pësuar lëndime dhe janë dërguar menjëherë për kujdes mjekësor. Gjendja e tyre shëndetësore ende nuk dihet.

Policia dhe grupi hetimor ndodhen në vendngjarje për të zbardhur shkaqet dhe rrethanat e këtij aksidenti tragjik.

Autoritetet u bëjnë thirrje të gjithë drejtuesve të mjeteve që të respektojnë rregullat e qarkullimit për të shmangur ngjarje të tilla tragjike.