Deputetja e Partisë Demokratike, Dhurata Çupi, në fjalën e saj në seancën plenare të Kuvendit, ka akuzuar qeverinë dhe mazhorancën socialiste se po përdorin shtetin për të forcuar pushtetin personal të kryeministrit Edi Rama.

“Jemi në një udhëkryq për të ardhmen e demokracisë”

Çupi e përshkroi situatën politike si një moment kritik për Shqipërinë, ku vendi rrezikon të bëhet një demokraci fasadë, ku ligji nuk sundon më, por pushteti është i përqendruar në duart e një njeriu.

Ajo akuzoi Ramën për shkeljen e normave demokratike, manipulimin e institucioneve dhe kontrollin e çdo pushteti në vend:

• “Edi Rama është kryeministër, kryetar parlamenti, kryetar i bashkisë së Tiranës, në krye të drejtësisë dhe shoqërisë civile.”

• “Ai deshi të emëronte edhe kreun e opozitës, por dështoi me sukses.”

“Qeveria e ka kthyer shtetin në një parti-shtet”

Çupi paralajmëroi se, 73 ditë para zgjedhjeve, mazhoranca po përdor administratën dhe burimet shtetërore për të favorizuar Partinë Socialiste, duke e quajtur këtë një kërcënim serioz për demokracinë.

Ajo e mbylli fjalën me thirrjen se opozita është e bashkuar për të garantuar një qeveri që punon për qytetarët, jo për një individ dhe pushtetin e tij personal.