Policia e Dibrës ka njoftuar sot se ka proceduar penalisht ish-drejtoreshën e Spitalit Rajonal të Dibrës, Irini Shehu, 44 vjeçe, për veprën penale të “Përndjekjes”. Sipas autoriteteve, ajo dyshohet se ka përndjekur disa punonjës të spitalit ditën e djeshme.

Ngjarja lidhet me incidentin e dhunës së ushtruar ndaj shefit të Financës së spitalit, Shaban Uklala. Më 11 shkurt, gjatë një përplasjeje mes Shehut dhe Uklalës, drejtoresha dyshohet se e ka goditur me një send të fortë në fytyrë, duke i shkaktuar lëndime. Uklala ka denoncuar ngjarjen në polici dhe ka akuzuar Shehun për plagosje të lehtë.

Policia ka referuar rastin në prokurori dhe ka nisur procedimin penal ndaj 44-vjeçares për veprën penale të “Përndjekjes” dhe “Plagosjes së Lehtë”. Materialet procedurale janë kaluar në Prokurorinë pranë Gjykatës së Shkallës së Parë të Dibrës për veprime të mëtejshme.