Një person është dorëzuar në polici lidhur me incidentin e të shtënave me armë zjarri që ndodhën më 26 shkurt para gjykatës në Gjermani, gjatë seancës për vrasjen e boksierit shqiptar Besar Nimani. Sipas gazetës gjermane “Bild”, i dorëzuari është Berat Nimani, vëllai i boksierit të ndjerë.

Avokati i familjes Nimani, Peter Wuller, ka konfirmuar se dorëzimi ka qenë paqësor dhe bashkëpunues. Ngjarja ka ndodhur gjatë seancës gjyqësore në ngarkim të të pandehurit, Huseyin Akkurt, i cili akuzohet për vrasjen e Besar Nimanit. Raportohet se gjatë përleshjes, vëllai i Akkurt është qëlluar në këmbë, ndërsa babai i tij është qëlluar në mushkëri dhe ndodhet në gjendje kritike për jetën.

Berat Nimani tashmë është në stacionin policor të Bielefeld dhe pritet t’i caktohet masa e paraburgimit. Kjo ngjarje vjen si pasojë e një serie përplasjeve me grupin që vrau Besar Nimanin, një boksier i njohur në Gjermani. Besar Nimani u vra para disa muajsh pasi kishte pasur një grindje me grupin e personave që e sulmuan kur po hynte në një lokal, duke parkuar “BMW”-në e tij. Për krimin që ka ndodhur, po gjykohet Huseyin Akkurt, ndërsa një person tjetër është shpallur në kërkim.