Presidenti ukrainas, Volodymyr Zelensky, ka shprehur besimin se marrëdhëniet e tij me Shtetet e Bashkuara mund të riparohen, pas tensioneve që shpërthyen gjatë takimit të tij me Donald Trump në Shtëpinë e Bardhë.

Në një intervistë për Fox News, Zelensky theksoi se marrëdhëniet midis Ukrainës dhe SHBA janë të thella dhe historike, duke theksuar se nuk bëhet fjalë vetëm për marrëdhëniet mes dy presidentëve, por për një lidhje të fuqishme mes dy popujve. Ai shtoi se gjithmonë ka ndjerë mirënjohje për popullin amerikan për ndihmën që ka dhënë në mbrojtjen e popullit ukrainas.

“Sigurisht,” tha Zelensky, duke u përgjigjur në pyetjen se nëse marrëdhënia me Trump mund të shpëtohej. Ai theksoi se populli amerikan ka qenë një mbështetje e rëndësishme për Ukrainën dhe se ndihma që ka ardhur nga SHBA ka shpëtuar shumë jetë.

Megjithatë, Zelensky pranoi se përplasja mes tij dhe Trump ishte e keqe për të dyja palët dhe ka krijuar tensione që mund të kenë ndikim në të ardhmen e marrëdhënieve dypalëshe. Ai theksoi se ka ende shpresë për riparimin e këtyre marrëdhënieve dhe për forcimin e bashkëpunimit mes dy vendeve, veçanërisht në luftën që Ukraina po zhvillon kundër agresionit rus.