Një aksident i rëndë ka ndodhur në orët e para të mëngjesit në aksin rrugor Elbasan-Peqin, në fshatin Paulesh, ku kanë humbur jetën Fatbardha Shahini (55 vjeç) dhe djali i saj, Klodian Shahini.

Ata udhëtonin me një makinë tip “Mercedes Benz”, kur u përplasën nga një furgon i drejtuar nga 44-vjeçari Anesti Bufi. Përplasja ishte aq e fortë, sa automjeti u shkatërrua pothuajse plotësisht, duke lënë nënë e bir të bllokuar brenda, ku fatkeqësisht humbën jetën në vend.

Nga aksidenti u plagosën edhe drejtuesi i furgonit dhe katër pasagjerë, të cilët u transportuan në spitalin e Elbasanit dhe ndodhen jashtë rrezikut për jetën.

Policia ka nisur hetimet për zbardhjen e plotë të shkaqeve të aksidentit tragjik.