Autoritetet italiane kanë vënë në pranga një 35-vjeçar shqiptar, i cili u kap me 56 doza kokainë, me një peshë totale prej 100 gramësh. Droga ishte fshehur brenda një kavanozi qelqi, në trungun e një peme në një plantacion lajthish në zonën e Vairano Scalo.

Mediat italiane raportojnë se ai ishte nën vëzhgim prej ditësh dhe dyshohet se ndihmohej nga një 24-vjeçar shqiptar, i cili u ndalua, por po hetohet në gjendje të lirë.

📍 Si ndodhi arrestimi?
Karabinierët vunë re se 35-vjeçari udhëtonte çdo ditë nga Vairano Patenora drejt një parcele në fshatin e komunës Caianello, ku qëndronte për orë të tëra. Në momentin që u largua prej andej, policia ndaloi mjetin “Volkswagen Passat”, të cilin e drejtonte 24-vjeçari, ndërsa i arrestuari ishte pasagjer.

Gjatë kontrollit, u gjetën 1710 euro cash, ndërsa pas kërkimeve të mëtejshme në plantacion, oficerët zbuluan lëndën narkotike të fshehur në një pemë.

Pas arrestimit, 35-vjeçari u transferua në burgun “Santa Maria Capua Vetere”, ndërsa hetimet për bashkëpunëtorët e tij po vijojnë.