Policia e Elbasanit ka arrestuar një 30-vjeçar, i cili shpërndante kokainë dhe kanabis në Peqin. I arrestuari, me inicialet E.S., u përpoq të largohej nga policia pas kërkesës për ndalim, duke rrezikuar jetën e oficerëve të rendit.

Gjatë kontrollit në banesën e tij, policia ka gjetur dhe sekuestruar një sasi të konsiderueshme droge, përkatësisht 630 gramë kanabis dhe një sasi kokainë. Po ashtu, u gjetën edhe 3 armë gjahu, 2 armë të ftohta (thika), 1 armë sportive, 55 fishekë, sasi baruti për mbushjen e fishekëve, një palë dylbi, si dhe një detektor metal-kërkues.

Babai i të arrestuarit, një 67-vjeçar me iniciale F.S., është proceduar penalisht për përfshirje në aktivitetin e paligjshëm. Materialet janë referuar në Prokurorinë pranë Gjykatës së Shkallës së Parë të Elbasanit për veprime të mëtejshme.